خطاى نامه ( شرح مشاهدات سيد على اكبر خطائى معاصر شاه اسماعيل صفوى در سرزمين چين ) — الصفحة ٣٩٦
آغاز سخن
قزلر اولوب بعضيلرينك هنوز بكارتى زائل اولمامشدر ديرلر ايدى . ارباب صنايع بىحد و شمار و اكثر ختاى خلقى حسن و جمال صاحبى ايكن شهر مزبورك اهاليسى غايتله جميل اولمغله حسن آباد ديو شهرت شعاردر .
شهر مزبوردن حركتدن صكره بر نيجه شهر دخى كچيلوب ذوالقعده‌نك اون ايكنجى كونى ايكى جيحون قدر موج انكيز بر عظيم صودن كشتيلر ايله عبور اولندى .
بعده بعضيسندن كشتى و بعضيسندن كوپرى ايله بر قاچ نهردن دخى كچيلوب ذىالقعده‌نك يكرمى يدنجى كونى صدين‌فو نام شهر عظيمه واريلدى .
شهر مزبور غايتله معظم و اهاليسى و عمارات عاليه‌سى چوق بر شهردر از جمله بر بيوك تپخانه‌نك اورتاسنده اللى زراع قامتلى اعضاسى متناسب پرنجدن آلتون يالدزلى بر صنم ياپمشلر . و هر عضونده برر ال صورتى و آووجنده برر كوزه ياپمشلردى . و اول صنمك تمام ممالك ختايده بت هزار دست ديو شهرتى واردر . ذكر اولنان صنم و اطرافنده اولان عمارت طاشدن يونلمش بر مرمر كرسينك اوزرنده اولوب هر طرفنده پنجره‌لر و غرفه‌لر ياپمشلر . و ايكى آياقلرينى كه اونر زراعه قريبدر برپايه اوزرينه بر وجهله دو كمشلردر كه قطعا كورنميوب معلق طورر ظن اولنور . اول صنمى ياپمغه يوز بيك خروار پرنج صرف اولدوغى مشهوردر .