وليد الكعبة — الصفحة ٣٣٣
در بيان مسلك صحيح
در بيان مسلك صحيح
دكله كل اى ايليان دعواى عشق * دل اوى اولمق كرك مأواى عشق
يوقسه عشق نامن الان سرده هوا * هم مضل هم رهزن وهم بيدوا
هيچ ايدرمى عشق تقليدى قبول * روضه عرفانه ايتديرسون دخول
اولا شرع شريفه انتساب * لابد اولمش كه اوله قرب اكتساب
باب الابواب اولدى چون شرع منير * اولميان داخل اولورمى مستنير
شرعله ايتمك كرك كسب صلاح * فتح اوله صكره اكا باب فلاح
رفرف عشق اوله اول جانه دليل * اچيلور منهاج پر فيض خليل
كر عقايد اولمسه وفق كتاب * سد اولور مطلق اكا راه صواب
منصفانه حصر ايدوب فكر جلى * راضيمى الله محمّد له على
كسب ايدن بو وجهله حسن خصال * اوله مظهر كيم تجلّى وصال
حفظ شرع الله ايچون اول نامدار * ايلدى بونجه غزايى اختيار
اتقاسن درك ايدوب اولمه عنيد * ايتديلر شاهى صلاة ايچره شهيد
كر محب حيدر ايسه ك بى ريا * اثرينه ايله سلوكه اعتنا
امرى طوت ايله نواهيدن حذر * چكميه سك صكره خسران وكدر
عاقله لا يقميدر فكر سقيم * مصطفى اثرى طور ركن مستقيم
جاهد دين مبين اولدى على * ماحى كفر متين اولدى على
مظهر سرّ محمّد در على * هم توجهدار احمد در على
ايله نفسكله جهاد اكبرى * بوله سن فيض رضاى حيدرى
بو رضا عين رضاى مصطفى * هم رضاى ذات پاك كبريا
سلّموا صلّوا على فخر الأنام * هم علىّ وآل واصحابه تمام