مناهج البكاء فى فجائع كربلاء — الصفحة ١٨٣

المنهج الثامن والعشرون

اجه احسين الخواته اودارن اعليه * او عبد الله الطفل وصه الحرم بيه

يخويه گالن امغيّره او صافه * ثلث تيام عيب الماي شافه

اعيونه غايره ومذبل اشفافه * العطش والحر يخويه احسين ماذيه

گالت عمته طفلك تراده * او ما للگوم غيرك بعد راده

ليهم تاخذه بحالة امهاده * بلكت تنتخي واحد اويسجيه

شاله احسين ومّه انفرد عنها * النوايب من ملابسهن چسنها

الفواطم من تشيط ايمانعنها * ابروح الطايره وعيون تربيه

نده يا گوم ندهه اتهد الاجبال * اخوته الموت بينه اوبينهم حال

العداوه اتصير بين ارجال وارجال * او طفل البالمهد شنهو المسويه

طفل عطشان هذه ثلث تيام * يلوع امن العطش ما هوّد او نام

ظامي ايموت وانتم عرب واسلام * هذا الصار محّد چان مجريه

تجدّم حرمله للطفل ورماه * ابسهم قطع وريده او بالدم اسقاه

ابچفه احسين سيل الدم تلقاه * او ذبه للسمه للحق يراويه

نعي

ناداه او هتف بالجيش كله * او على ساعده معروض طفله

جرم هالطفل ماله او زلّه * ليش العطش ساعه او يچتله

هذي على اسم العرب ذلّه * امصاب الطفل ما صار مثله

گطع رگبته حرمله ابنبله * او من سدر عوده بيه لهله