شاه عباس ( مجموعه اسناد و مكاتبات تاريخى همراه با يادداشتهاى تفصيلى ) ( فارسى ) — الصفحة ٢٠٢

نامهء صدر اعظم على پاشا به شاه عباس

چار بالش خلافت و كامرانى ، زينت افزاى تخت و نگين ، سر لوحهء ديباچهء دودمان عثمانى ، نقاوهء صدرنشينان مسند فرمانرانى ، فايق سلاطين آفاق بالارث و الاستحقاق ، الدارج مدارج السلطنة بالاجماع و الاتفاق ، غياث الاسلام و المسلمين ، ظل اللّه فى الارضين ، دولت لو شوكت لو سعادت لو پادشاهمز ، اعزّ اللّه تعالى انصاره حضرت لرى بر پادشاه همايون مقدم و شهنشاه مظفردم در كه آفتاب دولت لرى افق هدايت سبحانى دن پرتو انداز عالم و زمام سلطنت و جهاندارى دست عنايت صمدانى دن قبضهء قدرت لرينه مفوّض و مسلم اوللدنبر و ميان ممالك مسلمين ده اتفاق و اتحاد آثارى پيدا و رفاهيت و استراحت اطوارى هويدا اولوب ما بين الطوايف مشركين - ده اختلاف و اختلال علايمى صورت نما اولمغه باشلدى .

بيت

هميشه باد عداوت ميان گبر و يهود * ز هر طرف كه شود كشته سود اسلام است

بناء على هذا ، عون و عنايت پروردگار و صون و حمايت رسول مختار و كرامت و هدايت صحابهء كبار ايله دين و دولته نافع بعض احوال و آثار ظهور ايتمكله مزاج شهامت امتزاج پادشاهيده ولايت وَ الَّذِينَ جاهَدُوا فِينا لَنَهْدِيَنَّهُمْ سُبُلَنا « 1 » فحواسى قرار و فاتح ممالك كفار خاكسار اولان آباء و اجدادى مسلكنه مسالك اولمق خاطره سى طبع همايون لرنده استحكام و استقرار بولوب طوايف مزبوره - دن أَشَدُّ كُفْراً وَ نِفاقاً « 2 » آيت كريمه سنه مظهر اولان بعض مستحقان عذاب نار وَ مَأْواهُمْ جَهَنَّمُ وَ بِئْسَ الْمَصِيرُ « 3 » مدلولنجه اعمال سيئه گرفتار ايتمك نيت خالصه سيله بالذات سفر ظفر رهبره توجه ايلمك ملحوظ خاطر فيض مآثر لرى اولمشدر .

( 1 ) - سورة العنكبوت 69 ( 2 ) - التوبة 97 ( 3 ) - وَ مَأْواهُمْ جَهَنَّمُ وَ بِئْسَ الْمَصِيرُ ( سورة التحريم 9 )