اسناد ومكاتبات سياسى ايران ( از سال 1105 تا 1135 ق ) ( فارسي ) — الصفحة ٨٩
نامه صدر اعظم عثمانى به صدر اعظم ايران
جزاير طرف لرينه سوء قصد لرى اولدوغندن ماعدا بغدادك جانب شرقى سنده حويزه ايله بغداد اراضيسى حدودنده واقع بنىلام اشقياسنى دخى تحريك و حويزه اعرابندن آل عزى و شرقا رخيل عشيرت لرندن يدى سكز يوز مقدارى تفنگانداز سوارى و برملكه اشقياى مرقومه على الغفله كلوب بغداد مقاطعاتندن خراسان مقاطعه سى قراسنك دواب و مواشى لرين نهب و غارت ايدوب الحاصل خان مرقومك اول حدود و حوالى ده بونك امثالى نيجه نيجه اوضاع ناهموارى ظاهر و پديدار اولدوغى سده سنيهء سلطنت مداره عرض و اعلام النوب و بو دودمان عظيم الشان عثمانيه نك اول خاندان معلى نشان صفويه ايله توارث آبا و اجداد ايله مصون و مؤكد و مدت مديده دن بر و مستمر و مشيداولان مصافات قديمه و موالات مستديمهيه مغاير اولمغله اشبوه مكتوب مخالصت صدور كشيدهء سلك سطور و فرستادهء حضور معالى موفورلرى قلنمشدر . ان شاء إله تعالى لدى الوصول لوازم حب و ودادى مراعات وكلاى طرفيننه علاوه حسن اهتمامدن اولان حالاتدن اولمغله شقى مرقوم مغامس و اتباعنه و ساير بغداد و بصره ايالت لرنده اولان عشاير و قبايل عربانده حويزه خانى طرفندن من بعد صاحب جيقلميوب و قول اولنميوب و بر طريق ايله تقويت و يرلميوب طرد و ابعاد اولنجق اوزره تنبيه ايله نيجه دهور و قروندن برو ايكى دولت عليه تك بيننده تطرق خلل دن محفوظ اولان مصافات قديمهء روز افزونى تأكيد و تائيد و شد و ثاق اكيد ايله تشييد و تائيده لطف لرى بىدريغ بيورلمق ملحوظ در .
باقى هميشه ايام سعادت و كامرانى متمادى و مستدام باد برب العباد .
فى اواسط 123 [ 1 ] [ * ]
( 1 ) - چنين است در نسخه و ظاهرا منظور 1123 است كه رقم هزار اختصارا نوشته نشده اگر چنين باشد صدراعظم ايران ميرزا محمد مؤمن خان اعتماد الدوله بوده و صدر اعظم عثمانى بلطه جى محمد پاشا . ( * ) بايگانى باش وزيرى استانبول ( تركيه ) نامهء همايون ج 4 ص 214 - 213