ديوان النصاريات — الصفحة ٤٩

واحچي الجرى بالغاضرية * أو هضم الذي صاير عليه

عگب الخدر امشي سبيه * ليزيد ودوني هديه

شنهو السبب ما اعتنوا ليه * بيهم مضلت ناغريه

لنخوه أو لشيمه هاشميه * ينامون عن هذي الرزيه

واحسين دمه عند أمية * اشبيدي هلي باچوا بديه

يا طارشي دسرع بالكتاب * بالك تعن أو حث الرچاب

للنجف واقصد داحي الباب * أو قله الك مرسول بعتاب

من زينب أو سكنه أو رباب * أو خبره احرگو كوفان الاطناب

والأطفال ماخلو لها اثياب * أو بناتك يبويه عگب الحجاب

راحن سبايه ابديرت اجناب * لو ناشدونه اشننطي اجواب

ملچن عشيره انگول غياب * حسافه يروس العرب ينجاب

على الذل لو يتوا اليوم الرگاب

يا طارشي الحيدر تعناه * للغري الگبره وجف وانخاه

وخبره بجميع الجرى أو شفناه * أو شفنا هضايم عگب عيناه

أو لحسين گله اشلون تنساه * بالغاضرية أو لحد اوياه

اوحيد أو صفق يسراه ابيمناه * وخوته چتل ومسطره احذاه

أو نار العطش تلتهب بحشاه * واعلى الشرايع نازله اعداه

والماي يمه أو لحد اسگاه * لمن گضى ظامي اويلاه