ديوان النصاريات — الصفحة ٢١

يبوي لا تشوفيني ابعينچ * اخافن ينخطف لونچ أو يصفر

صد الباجي اعياله ابعينه * بچن عنده اونادن ياولينه

عسن للغاضرية لا لفينه * أولا بينا يوالينه تحير

اجت زينب يوصيها بلعيال * يوصيها ابعليله أو كل الأطفال

شاف الدمع فوق خدودها سال * تگله على افراگك ما اگدر اصبر

گام ايهون افراگه عليها * أو بين بعد عين الله وليها

عگب ما جاب كل الصبر ليها * ركب غوجه أو للميدان سدر

ليش الموت الأحمر راغ واصفر

اثاري احسين للميدان سدر

سدر واعلن ابحد السيف ناره * أو لعنان السما ثور شراره

خلى الليث ما يندل فراره * يفر ويجيه موت آمنين ما فر

تفر اگرومها أو يحطم عليها * يحوم ابها أو يحوم الموت بيها

چم حران ذبه عند اديها * أو خلى الخيل بالهامات تعثر

فل اجموعها اولف الروايا * ابسيف رضع من ثدي المنايا

شق الزلم والخيل السبايا * حدسها اوذب الأزرق فوق الأحمر

صك الخيل وادعى الخيل طشار * ابسيف للدرع والطوس فزار

رو العود سوى الصار ما صار * أو چبده امن العطش ويلي تفطر