ديوان النصاريات — الصفحة ١٩

تخيل جايبه ميه بديها * شاله احسين ودموعه تنثر

گامت تستدير اعيون طفله * شبح عين لبوه اوعين لهله

آيس شاف ميه ما حصله * رد غمض اعويناته أو سكر

شمه أوجبه ابصدره أو خده * أو چبد احسين يابس مثل چبده

يبويه ما بعد للعيش رده * أهو ايحاچيه اولن سهم المقدر

طاخ الطفل للگاع أو تعفر

أو دمه مثل ماي العين فجر

تلگى احسين دم الطفل بيده * اشحال اليچتل ابحضنه وليده

سال أو ترس چفه من وريده * اوذبه للسما أو للقاع ما خر

اويلي من لفت سكنه تنادي * يبويه العطش ها الفت افوادي

صدت لن أخوها الطفل غادي * يلولح رگبته أو دمه يفور

يبويه ذاب چبدي أو چبدة أمه * دخليني أو دعنه وشمه

يبويه ليش ما تسجيه دمه * بلچن چبدته تبرد امن الحر

يخويه عون من حبك أو شمك * يخويه عون من راواك لمك

لغسلنك يخويه ابفيض دمك * أو گبرك بالگلب يا خوي لحفر

گام احسين يمشي يم الأنصار * وقف يمهم أو چبده امن العطش نار

نده عباس خويه والدمع فار * يخويه گوم لينه الساع واحضر