كتاب گيلان ( فارسى ) — الجزء ٢، الصفحة ٥٢٣

بوگو واگو

انى ابدانى باغه كاول زه‌ايم * شوئيم پرچين ره ، اجار گيفتيمى

برنج بارره چاروادار گيفتيمى * روخانه كولا ، توته‌دار ، كاشتيمى

پيله توسه دارانه ، نوب تاشتيمى * سراچينه باره فروختيم ميره

مىچوخا ، جراموئى ، دوختيم ميره * چهار سال تمام ، خورد و خواب ناشتيمى

ز بس كار كوديم ، هيچ تاب ناشتيمى * بازام خلقه گب ، از مىسر ، كم نوبو

مىا - قلبه‌سر ، ايپچه مرهم نوبو * چى واستى كودن ، گب كه قلق ناره

پيچازايش هيچ‌جا كه فندق ناره

*

بو گفتم خوبه ايپچه درويش ببم * ايذه صاحبه هيكل و ، ريش ببم

پاتاوه دبستم ، دكفتم به را * بوشوم اصفهان پير دولتسرا

تبرزين و كشكول و قليان بيهم * ايتا جوزدان خراسان بيهم

خلاصه بوبوم فرقهء خاكسار * زه‌ايم پرسه ، بازاره گوشه‌كنار

هميشه ده مىچنتايى ، پول دوبو * تىديل هرچى خواستى ، مىكشكول دوبو

فقير بوم ، ولى پادشايى كوديم * اگرچه به ظاهر ، گدايى كوديم

جناب نقيب حكمرانى كودى * زه‌اى گيفتى ، كفترپرانى كودى

حشيش دوغ وحدت سرانجام نوبو * تىجانگى ، جه اون بهتر ايام نوبو

بازام ان اونا گفتى غولا بيدين * انى پاى تا زانو چولا بيدين

*

بو گفتم : خوبه بعد ازين داش ببم * تقلا كونم بلكه فراش ببم

ايتا چاقوى كار زنجان بيهم * ايتاپستك و ، شال كرمان بيهم

اى جوفت كفش داشتيم دهن دولچه بو * انى پنجه گبرى بو ، بىگولچه بو

بنام دوگمه ايلمك مىارخالوقه * وانام مانگوله ، مىسر باشلوقه

جه مىداد ، شكمدار زناى ، وارگادى * سبيلانا دلاك ، فنر درگادى

مىپيش قمه يا ، گاه‌به‌گاه آب دائيم * مىزنجيره ، هرروز ، دو بار تاب دائيم

ايتا حَرفه واستى ، ايتا خون كوديم * محله زاك و ، زوكا ممنون كوديم

ايتا نخ سبيلا فادائيم گرو * همان ، هون سَنَد بو ، نزه‌ايم نارو

چى اقبال ، عجب روزگار داشتيمى * سيورسات مرتب ، وقار داشتيمى

بزه عاقبت « داش گرى » وردكفت * امه نازنين فيرينه آب جكفت !

*

بو گفتم : نواپس ببم بىجهت * بشم كسب ره ، كسب پور منفعت

كوكاره بيافم كه بىپول ببه * خوپوسه نبه ، مست بولبول ببه

وكالت ، طبابت نيبه بىجواز * قضاوت مهمه ، مىپا ره دراز

ببم شاعر ، هركس دينى شاعره * ميره شعر گفتن نايه هيذره

اداره بشم ، پارتى و ، پول خايه * به كسمايى قول ، چاه‌ره ، دول خايه

معلم ببم ، گرچه مشكيل نيه * ولى كار دلخواه مىديل نيه

بشم درس بخوانم ، حواس نارمه * پيرابم مخارج لباس نارمه

جه عطار و بقال و سبزىفروش * بگير تا به بازار مج چان بدوش

اگر پول نبه هيچ‌كى ، حاجى نيبه * هيزار سال ده ، سنگر شاقاجى نيبه

دواتگر ببم قيچى كارا نانم * چلنگر ببم ، هيچ اچارا نانم

ببم بنا ، آجور ، مىمغزا خوره * ببم قالىباف ، نقشه زحمت داره

ببم نعلبند ، اسبانا ترسمه * انى جوفتك و دندانه ترسمه

بشم زرگرى تيزآبه نانم * بشم خياطى ، پارچه خوابه نانم

ببم مالا ، سكاندارى مشكيله * پوتين‌دوز ببم ، پيشكارى مشكليه